Dopòwiescë do: 'Heroja naszégò czasu'

Przez: Michôł

Michôł — Sat, 29 Sep 2007 18:05:14 +0000

Kaszëbskô lëteratura jak narô fertowała sã wnetka le kòle sprawów wôżnëch chòba w pierszi rédze dlô prostich lëdzy, téj mòże prawie dlôtë nié mia jesz mòżnotë przińc do rëchtu z òglowòlëdzczima problemama? Mést też problema je w historëji – Ruskô mia dobeté nad różnyma krajama, Kaszëbskô wiedno bëłô dobeté A w kraju dze co dzéń to biôtkã ò swòją juwernotã, filozofòwanié nié je mùszebné… Stądka w najich romanach barżi je ò tim, co robic bë òstac sã Kaszëbą a nié rozmëszlanié co mëszle chłop pò zabicu stôri a młodi białczi
Nié mòże zabëc téż ò tim, że nie dô sã rozkòscérzëc kaszëbsczégò pòzdrzatkù na swiat (czë òglowò filozofiji), jeżlë je jakô, czej nie mdzemë mielë >>genialnëch<< aùtorów ë do tegò dolmaczonëch na jine jãzëczi jak pòlsczi. Na przëmiôr, remùsowé filozofòwanié mô pòtencjał (mòże nié do kùńca przërównywólny do rusczich epopejów, në ë mòże nié je to ta sama klasa romanë), le na swiece nié mô wiele lëdzy, co rozmieją kaszëbsczi, téj jak mô sã ta lëteratura przepchnąc? Jak narô to chòba le Grass mô zaszłé wësôk, chòc czë mòże zwac gò kaszëbsczim aùtorã?

Przez: Hana

Hana — Sat, 29 Sep 2007 08:31:47 +0000

Tołstojizna, chòc përznã je zapëzglonô w ruską historiã i w religiã, równak je ùniwersalną filozófną teòrią, rozkòscérzną na całim swiece, a w XIX stalace nawetka miała jawerny cësk na lëdzy… a szło doch ò aktiwną dobotã…
I tak so mëszlã, że nót bë bëło kaszëbiznie téż filozófnëch teòriów – taczich zakòrzeniałëch w kaszëbsczim mëszlëniu, a razã ùniwersalnëch, co bë pòszłë w swiat…
Mie z dokazów Tołstoja nôbarżi sã widza „Smierc Jiwana Jilicza” – wmikanié w psychikã i dëchòwosc kògòs, chto za sztót ùmrze.
Kaszëbsczi lëteraturze tak përzinkã felëje ti ùniwersalëznë – tak, żebë déżëniã dokazu zrobic wiôlgą òglowòlëdzką problemã…

Mòjim snienim wiedno bëło jesz sztudérowac filozofiã…

Przez: Michôł

Michôł — Fri, 28 Sep 2007 23:04:03 +0000

Mie téż so widzy ruskô lëteratura, mést jak téż òglowòsłowiańskô. Në je le jeden aùtor, Lew Tołstoj, co jô lëdôł czëtac ò jegò pòzdrzatkù na swiat, leno knéżczi miôł czësto drãdżé do czëtaniô. Ana Karenina ë 3 dzele aùtobiografiji to bëłë dlô mie sztërë nôgòrszé ksążczi swiata

Pò rusczi filologiji to gwësno czëtôsz w òridżinale. Mie równak tak dobrze z rusczim nie jidze, tak téż do pòmòcë móm wiedno pòlsczi czë anielsczi dolmaczënk. Le téż sztërkama lubi mie dodac dolmaczënk z ti lëteraturë.

Przez: Hana

Hana — Fri, 28 Sep 2007 20:35:02 +0000

Dzãka Michôł:)

Në to mòja glëpasô ùdba, żebë jic na ruską filologiã równak sã przëdôwô dlô kaszëbiznë
a wszëtcë sã ze mie wëszczérzelë!
Wedle mie ruskô lëteratura je nôbëlniészą lëteraturą swiata, nôbarżi głãbòką i filozofną, temù nié blós Lermòńtow, ale mëszlã, że jesz jaczés jiné téż wëjimczi wënalézã do dolmaczeniô.
Pòzdrówczi!

Przez: Michôł

Michôł — Wed, 12 Sep 2007 13:57:27 +0000

Richtich bëlny dolmaczënk. Je widzec w tim profesjonalną rãkã

Jô móm czëtóné Lermontowa pôrã miesąców dowslôdë na ùczbach rusczégò, a téż priwatno dlô se w pòlsczim jãzëkù. Wedle mie to równo czë w òridżinale czë w dolmaczënkù, to richtich grãdo sã gò czëtô. To nie je letkô lëtaratura, barżi (to mòże blós mòjé zdanie) szlachùje za filozofiją. Wiele w jegò dokôzach refleksëji, pesymizmù, smùtkù – gwës rzecz nie dlô wszëtczich.

Le co bë równak nie rzec, je òn przédny przedstôwca romantiznë w Rusczi a gwësno téż je wiedzëc, że ta lëterackô epòka do czëtaniô nigdë letka nie bëła. Z drëdżi starnë, w przëtrôfkù Lermontowa, nót je sã wczëtac, żebë dozdrzec nadzwëkòwòsc jegò pisaniô.

Móm wiarã, że Lermòntow sã jesz ù naju pòkôże. Fejn, że w kùńcu jidze cos jegò przeczëtac pò kaszëbskù