Czëtnica

Czëtanié Remùsa

mark — Thu, 27 Nov 2008 21:42:51 +0000

9. gòdnika ò 6 pp w Tawrnie Mestwin na Straganiarsczi 20-23, we Gduńskù, mòże wësłëchac cëzojãzëkòwé wersëje dolmaczënków pòwiescë Aleksandra Majkòwsczégò “Żëcé i przigòdë Remùsa“.

Czëtanie ë promòcëjã òrganizëje gduńsczi dzél KPZ ë je òno sparłączoné z òbchòdama rokù Aleksandra Majkòwsczégò, jakno ë z dolmaczënkã “Remùsa” na anielsczi ò jaczim ma Wama ju rëchli pisalë.

II Kònkùrs Bëtowsczégò Kùrierë na òpòwiadanié Science Fiction

mark — Wed, 15 Oct 2008 20:55:04 +0000

Wiadło ò kònkùrse w pòlsczim jãzëkù

Redakcëjô Bëtowsczégò Kùrierë ògłôszô ju drëdżi w pòsobnicë

Kònkùrs na òpòwiadanié Science Fiction w kaszëbsczim jãzëkù

Dokôzë nót je sélac do 30 stëcznika 2009 rokù. na adresa redakcëji z dopisënkã: “Kònkùrs S.F.”
Robòtë mùszą bëc niepòdpisóné, nacéchòwóné mërkã, zamëkac w se co nômni 2 znormalizowóné starnë A4, równak nie wicy jakno 10, pisóné fòntã Times New Roman w miarze 14, w 3 egzemplôrach. Wëdowiédzã ò ùsôdzcë (miono, nôzwëskò, adresa, telefón) nót je dodac w zamkłi kùwérce.
Òrganizatora dôwô so prawò drëkù nôlepszich dokôzów w òbéńdowëch gazétach wëchôdôjącëch na Kaszëbach.

Trzë pierszé place òstóną dëtkòwò nôdgrodzoné.

Adresa redakcëji:

Kurier Bytowski
ul. Zielona 5
77-100 Bytów

Żëcé ë przigòdë Remùsa - pò anielskù

mark — Mon, 22 Sep 2008 20:00:20 +0000

Pòwiesc “Żëcé ë przigòdë Remùsa” Aleksandra Majkòwsczegò, dożda sã anielsczégò dolmaczënkù. Je to ju czwiôrti domaczënk ti pòwiescë na cëzy jãzëk.
Robòta dérowa nad tim òd 2002 rokù (tuwò mòżemë sómi to pòswiadczëc, pòwòłując sã na priwatną kòrespòndecëjã z tim sparłãczoną), a ùsôdzczëniama tegò dolmaczënkù są dwie białczi z Minneapolis, Minnesota w Nordowi Americe: Blanche Krbechek (z kaszëbczi stowôrë: Kashubian Association of North America) ë Kasia Gawlik-Luiken. Ksążkã wëdôł Institut Kaszëbczi, dze téż jã mòże zamówic (priz pòdôwóny na starnach to 30 złotëch)

Żëcé ë przigòdë Remùsa - anielskô wersëjô

Life and Adventures of Remus

dolm. B. Krbechek i K. Gawlik-Luiken
Gduńsk 2008, st. 496

Nowé tekstë

michol — Tue, 26 Aug 2008 14:38:14 +0000

Përznã czasu ju minãło òd slédnégò wpisënkù ò dodónëch tekstach. Në cëż bë tu wiele pisac - ferijë! Na szczãscé mómë je ju za sobą ë czas je nazôd wrócëc do przedstawianiô nowëch ë stôrëch aùtorów.

Òb slédné tidzénie dodôné mómë pòwiôstczi Cenôwë, chtërné miôł òn zapisóné w jegò ksążce ò kaszëbsczi gramatice (mòże ją nalezc na starnach WBC, ò chtërny mómë ju pisóné), Gôdczi kaszëbsczé mni znónegò ùsôdzcë z Kòsôkòwa Józefa Klebbë, kòrejańsczi kòmiks (sztrépk) ë dzélk czekawégò kriminału ò przigòdach lelekòwatégò detektiwa ë damsczégò frizéra.

Ùmarłi je król - niech żëje król!

mark — Sun, 17 Aug 2008 09:33:06 +0000

Tëli bëło trzôskù przë zrëszeniu ùdbë Kaszubska Biblioteka Cyfrowa, że terô pò prawie 3 latach mòże ju òstro rzec, że bëło to le wiele trzôskù ò nick! Nie bãdzemë tuwò sã nawetka mòcowac na kritikã zamkłoscë tich starnów, bò tak pò prôwdze to ni ma nawetka co kritikòwac. Ni mómë wiedzë ò tim, dlôcze sã nen serwis nie rozwinął, wiemë le, że miała to bëc nôwikszô kaszëbskô bibloteka jakô je przëstãpnô online - to szło przeczëtac w różnëch placach.

Në, le nie ùsôdzómë dlô waji starnów Czëtnicë, bë narzékac ë na szczãsce dô téż internetowé pòdjimizmë, jaczé nie dożdałë sã taczégò medialnegò pòmionu jakno na wëższô, a jaczich nimò tegò, a mòże na szczãscé, przezéranié radowac mòże. Taką je na gwës Wejherowska Biblioteka Cyfrowa. Tuwò dopiérze mòże òbôczëc, czim mòże bëc dobri zestôwk tekstów kaszëbsczich, tich sparłãczonëch z kaszëbsczim/pòmòrsczim jãzëka z tima ò òbéńdze Kaszëb.
Bë nie bëc gòłosłównëm rôczimë waji na starnë WBC - wpiszta tam w pòlu szëkbë pòsobno taczé słowa jakno:

Ceynowa
Lorentz
kaszubski

a òtemkną sã przed wama dzwiérze z pëszną wieleną kaszëbsczich zdrojów, do jaczich je czasã zwëczajno cãżkò dońc. Dostónczi bibloteczi mòżeta czëtac online, abò zladowac je na swój kòmpùtr.

Rôczimë do czëtnictwa - a je pò prôwdze co czëtac !

Wejrowskô cyfrowô bibloteka

Dzéń Kaszëbsczi Kùlturë na GÙ

mark — Fri, 09 May 2008 15:45:31 +0000

Katédra Slawisticzi i Karno Sztudérow „Pomorania” rôczą na Dzéń Kaszëbsczi Kùlturë na Gduńsczi Ùniwersytece, jaczi je òrganizowóny w òbrëmienim Festiwalu Slawisticzi „Słowiańsczé Farwë Smiéchù” i òdbãdze sã 12 maja 2008 rokù.

Programa Dnia Kaszëbsczi Kùlturë:

16.00 – wëkłôd Prof. Jerzégò Trédra na témã: SLAWISTIKA XIX W. Ò KASZËBIZNIE (Wëdzél Prawa i Administracji, 20.26)
16.30 – prezentacjô ò Kaszëbach, przedstawionô przez Prof. Jerzégò Trédra (Wëdzél Prawa i Administracji, 20.26)
17.00 – prezentacjô filmù Testament i kôrbiónkã z reżisérą A. Sipajło (Wëdzél Prawa i Administracji, 20.26)
18.00 – wieczórk kaszëbsczi pòézji: wëstąpią Róman Drzéżdżón, Karolëna Serkòwskô i karno, prezentëjącé kaszëbską spiéwóną pòézjã –Kùtin (Wëdzél Filologiczno-Historiczny, 1.43);
– Degùstacjô kaszëbsczégò zjestkù (Wëdzél Filologiczno-Historiczny, 1.43).

Bôczënk szkólny!

admin — Fri, 21 Mar 2008 08:53:19 +0000

Ekzamin z kaszëbsczégò dlô szkólnëch òdbãdze sã 26 strëmiannika ò gòdzënie 2 pò pôłnim w biurze K-PZ przë sztrasë Straganiarsczi 20-23.

Wniosk w fòrmace DOC mòże zladowac ze starnë K-PZ.

Arthur C. Clark nie żëje

michol — Wed, 19 Mar 2008 09:00:26 +0000

W nocë 18 strëmiannika ùmôrł jeden z nôbelnészëch eùropejsczéch ùsôdzców science fiction XX stalata, Arthur Charles Clark. Béł 90 lat stôri.

Ùrodzëł sã 16 gòdnika 1917 rokù w Anielsczi. Òd młodégò jinteresowôł sã kòsmòsã ë bãdąc ju 19 lat stôri òstôł nôleżnikã Britëjsczi Midzeplanetarny Stowôrë. Dwa razë, w latach 1946-1947 a téż 1950-1953 béł ji przédnikã.

Jegò pierszą nowelą bëło Rescue Party (pl. Wyprawa ratunkowa), zôs pòpùlarnotã dôłë mù wëdóné w latach 50 ksążczi: The Sands of Mars, Interpalnetary flight, Against the Fall of Night, Childhood’s End. Nôwikszim jegò dokazã, znónym nie le blós fanóm fantasticzi bëła 2001: A Space Odyssey (pl. 2001: Odyseja Kosmiczna). Ksążkã tã pisôł równoczasno z robieniem filmù ze Stanleyã Kubrickã. Dokôz nen béł zwënégą tak kòmercjową jak téż artisticzną.

Zmianë

admin — Sun, 16 Mar 2008 14:29:43 +0000

Mómë ju w ti naji Czëtnice dosc tëli tekstów - to baro fejn sprawa ë nót je za całowną robòtã pòdzãkòwac wszëtczim co miele w ni swój dzél. Mómë równak swiądã, ze nie wszëtczé tekstë napisóné są zgódno ze wskôzama kaszëbsczégò pisënkù, chòc tuwò cãżkò czasã je rzec, co je lóz, jeden aùtor pisze tak jiny jinaczi… Tak czë sak jesmë doszlë do tegò sztërkù, w jaczim nót je sprôwdzëc to co òsta ju òpùblikòwóné na najich starnach.

Do kùńca tegò miesąca mómë dla najich czëtińców przerëchtowóné testową wersëjã Czëtnicë, na chtërny mòże nalézc wszëtczé stôré tekstë. W tim czasu mdzemë rëchtowalë nową wersëjã (Czëtnica 2.0), w jaczi wikszi cësk chcemë dac na bezzmiłkòwòsc pisënkù. Dlôtë zachãcywómë do wzérania na starnë test.zymk.net a téż na to co mdze dzejac sã na nowich starnach www.czetnica.org.

Nôrodné Cyfrowé Archiwùm

admin — Sat, 08 Mar 2008 17:52:11 +0000

Na spòdlém ùdbë Ministra Kùlturë ò przesztôłcenim Archiwùm Mechaniczny Dokùmentacëji w jinstitucëjã ò wikszim krézu dzejaniô 8 strëmiannika pòwstało Nôrodné Cyfrowé Archiwùm.

Do zadaniów NCA przenôlégò:

archiwizacëjô cyfrowëch materiałów, w tim elektronikòwégò dokùmentu
archiwizacëjô òdjimków, zwãkòwëch nagraniów ë filmów
digitalizacëjô archiwalnëch materiałów
ùprzëstãpnióné cyfrowi wëdowiédzë ë archiwalnëch materiałów, téż online

Jak narô do òbezdrzëniô je kòle 80 tës. zdigitalizowónëch òdjimków. Midze jinszëma jidze nalézc ne ò Kaszëbach. Jak letkò mòże téż dozdrzec mają bëc téż przëstãpné cyfrowé nagrania wëwiadów, np. z Janã Drzéżdżónã.

Wicy wëdowiédzë ò dbie ë ùdbach NCA mòże dostac na starnie www.nac.gov.pl.