Czëtnica | …bò czëtania je nama nót!

W sobòtã 14 lëstopadnika 2009 rokù ò gòdz. 16.00, bãdze mòżna sã pòtkac z nôlëżnikama kaszëbsczégò lëteracczégò karna ZYMK.

Zéńdzenié bãdze miało swój plac w Gimnazëjóm miona Kaszëbsczich Runitów w Lëzënie.

Zymkòwcë rôczą brateczno do Lëzëna !!!

Zymk 7

To ju wnet dwa ksãżëcë jak mòże dobëc nowi (sódmy) zsziwk Zymkù, jaczi wëdalë: Wëdôwizna Region, Mùzeùm Kaszëbskò-Pòmòrsczi Pismieniznë ë Mùzyczi w Wejrowie ë Kaszëbskò-Pòmòrsczé Zrzeszenié. Bënë mòże nalezc czile “zymkòwich” debiutów, jakno ë tekstë ju z rëchliszëch zsziwków ùsôdzców ë tak mómë króm przedsłowia Rómana Drzéżdżóna, tekstë: Słôwka Fòrmellë, Adama Hébla, Mariana Jelińsczégò, br. Zbigniewa Joskòwsczégò, Słôwka Klasa, Darka Majkòwsczégò, Hanë Makùrôt, Grégòra J. Schramke, Alë Skibë ë Lucynë Sorn. Zsziwk mòże kùpic m.jin w knégòwnicë “Pod Gryfem” ë Mùzeùm w Wejrowié za kòl 7.50 zł co nie je gwës wiôldżim wëdôtkã nawetka jak na krizysowé czasë.

Rôczimë do czëtnictwa!

Hana Makùrôt

Hana Makùrôt – skùńcziła pòlską filologiã na Gduńsczim Ùniwersytece, dze napisa pierszi méstersczi dokôz w kaszëbsczim jãzëkù, òkróm tegò absolwentka licencjacczich sztudiów na czerënkù slawistika. Terëczasno je doktorantką filologicznégò doktorancczégò sztudium i zajimô sã témą: Jinterferencjowé przëjinaczi ù bilingwalnëch lëdzy w kaszëbsczi spòlëznie. Sztudérëje téż slawistikã, ruską filologiã i filozofiã. Aùtorka wicy jak 20 nôùkòwëch pùblikacjów z zasygù kaszëbsczi i słowiańsczi lingwisticzi. Dolmaczéra lëteraturë ze słowiańsczich jãzëków na kaszëbiznã (z rusczégò, serbsczégò, sloweńsczégò i pòlsczégò jãzëka), dolmaczéra Ùstawù ò nôrodnëch i etnicznëch miészëznach a ò regionalnym jãzëkù. W 2007 rokù lùreatka Lëteracczégò Kònkùrsu m. Mieczisława Strijewsczégò i laùreatka kùnkùrsu na nôlepszégò sztudérã Trójgardu Primus Inter Pares. W akademicczim rokù 2005/2006 – przédniczka Karna Sztudérów Pòmòraniô. Nôleżnik Pòlsczi Lingwistny Stowôrë (PTJ) i Stowôrë Dolmaczérów Pòlsczich (STP).

Hana pùblikùje téż w swòjim blogù, jaczi mòże nalézc pòd adresą hana.kaszubia.com.

Tómk Fópka ùrodzył sã 10 lëpińca 1973 rokù w Gdini. Pòchòdzy z Chwaszczëna, dze mieszkô do dzys. Skùńcził Mechaniczné Technikùm w Gdini, pózni Mùzyczną Akademią w Gduńskù jakno spiéwôk i aktor. Je zastãpnikã burméstra gminë Żukòwò, dirigeńtã chùru Lutnia z Lëzëna. Prowadnikã Radë Kaszëbsczich Chùrów i wiceprzédnikã Stowôrë Turisticzné Kaszëbë, nôleżnikã m. jin. ZK-P i ZYMK-ù. Pòetą i kòmpòzytórã, dzejôrzã kaszëbsczi, kùlturalny rësznotë- jednym z „barżi niepòkórnëch”.
Jegò czile wiérztów nalazło sã w antologii “Mësla dzecka” (2001r.) Wëdôwizna “Region” z Gdini wëda w 2003r. jegò zbiérk eroticznëch wiérztów “Szlachama kùsków” i dokôz mùzyczny “Pierszô Kaszëbskô Pasja” (nótë i platkã). Debutowôł wiérztą “Nigdë dosc” w “Nordze” (1999).
(wicy…)